監製伍健雄表示老闆見兩部戲都收得，認為有得繼續做，提議開拍第3集，兼且在香港影壇花旦、小生荒之際，捧下新人。記得第1集辦慶功宴時，女主角Jeana曾聲言恨拍續集，結果她被踢出局，第2集捧了連詩雅坐正做女主角。大姐大收到風，第3集女主角，連詩雅都未必有得留低，伍健雄說：“第2集都好成功，捧紅了連詩雅、Avis，讓他們獲更多人認識；第3集就想再搵新面孔，讓觀眾有點不同的感覺。劇情方面承接頭兩集，再拍得激一點，大膽去夜場搵女主角，好似當年麥當雄拍《靚妹仔》，都是出去夜場搵到溫碧霞、林碧琪回來。 ”愈拍愈激，《喜愛夜蒲3》豈非變成三級片？伍健雄說：“我又不想拍到好似《一路向西》這樣，尺度會維持在大膽的感覺，拍到好Sexy，引人遐想，不想去到色情感覺。 ” 好多電影已北上發展，港產片買少見少，但睇到《喜愛夜蒲》這些小本製作，只要加多些創意，轉一轉形式拍攝，就能夠殺出血路，觀眾自然懂欣賞。伍健雄期待《喜愛夜蒲》一直拍下去，成為系列電影，好似當年古天樂主演的《陰陽路》、鄭伊健的《古惑仔》一樣。